शराबे लत
शराबे लत आसा आझ म्हारै समाज दी मजूद सोभी समस्या मांझै एक एही आम समस्या जसरै शकार होछै का लई बडै तक सोभ आसा और एते शकार लोगे संख्या आसा आझ म्हारै समाजा दी लागातार बढदी लागी दी। शराबे लत करा झुटणै आळे सेहत खराब और एता करै पळा झूटणै आळे परिवारा और समाजा दी बी बूरअ असर।
शराबे समस्या और एते परिणाम
शराबे लत आसा एक एही समस्या जूण बडै भारी धैळै तक बणी रहा और अह रहा धैळी दर धैळी खातरनाक हंदी लागी। अह दैआ शरीर दी घातक बमारी लै जल्म। आदमी हआ शराबो आदी और सह लागा बडै भारी मात्रा शराबा झुटदअ। सेहत, आपणी निजी जिंदगी दी, कामा-काजा दी तथा आथिक स्थिति दी बुरै परभाव पळणे बावजूद बी करा शराबो आदी आदमी एतो लागातार सेवन। एते शुरूआत हआ कई बारी होछी अमरा का कभी कभार थोळी-थोळी करै झुटणै संघै और सूलै-सूलै बणा अह एक गंभीर समस्या जेथ शराबीए तलब हआ एतरी कि एता करै हणै आळी दाह-बमारीए जानकारीए बावजूद बी नी तेऊऐ जणै एतो सेवन बंद करदअ आथी। शराबा झुटणेओ पळा आदमीए सेहथा दी बूरअ प्रभाव। एता करै हआ गुरदै खराभ। एता करै हणै आळी बमारी लै बोला "सिरोसिस ऑफ लिवर" और ऐहा बमरीए बढणे बजह हआ कई बारी शराबीए टैमा का पहलै मौत। बमारी बढणै संघा हआ शराबी खूने ऊल्टी, वेहोशी, पेटै और पैरा दी सूजन आदी परशानी। काम-काज न करणे कारण हआ शराबी भारी आर्थिक घाटअ। एते बजह पळा घरै कलह, लळाई-झगळै, मन-मटाव, मार-पीट जेही समस्या पैदा।
समस्या दूर करणे तरीकै
एता का बचणा सका कई कदम चकी। शराबे लते हणै आळै नुकसाने बारै लागा लोग सचेत कराअणै। समाजे सभा दी शराबा पलाऊणै का लागा बचणअ ताकि नंऊंई पीळी दी एते बीज नी पळे। आमा-बापू, खासकर बापू लागा शराब छाडी करै आपणै शोहरू माठै लै आदर्श बळणअ।
एच आई वी / एड्स
मुख्य बचार
एक्वायर्ड इम्यूनो डेफिशियन्सी सिन्ड्रोम (एड्स) आसा माणुए प्रतिरक्शा तंतरा दी ह्यूमन इम्यूनो डेफिशियन्सी वायरस वजह का हणै आळअ रोग। अह रोग पा मरीजा और तेऊऐ परिवारा बडी भारी मुश्कळा दी। एऊ रोगो नी एभै तैणी अजा लाज निखळअ आथी, पर जै सचधानी बरते तै सका एऊ रोगा का बचाव हई।
एच आई वी और एते परिणाम
एच आई वी आसा एकी परकारो विषाणु या वायरस माणुए प्रतिरक्शा तंतरा बूरी तरह खराभ और बेकार और आदमी हआ आखरकार एड्सो शकार । १९८० का आझ तैणी गऐ लगभग ३६ मिलियन लोग एड्से वजह मरी। अह रोग फैला हेठै लिखै दै कारणा करै:
- एड्से बमारी आळै आदमीए खूना चढाऊणे कारण
- एड्से बमारी आळै आदमी संघै यौन संबंध बणाणे करण
- एड्से बमारी आळै आदमी लै लाई दी सुईओ परयोगे कारण
- एड्से बमारी आळी माँ जै सूँदी हआ या आपणै शोहरू लै दूध पणैउए तै सका तेऊ शोहरू बी एड्स हई
एच आई वी करा मणूए प्रतिरक्शा तंतरा बूरी तरह बेकार और आदमी हआ एड्सो शकार । जै एकी बारी कुण एड्सो शकार हई जा, तेखअ हआ तेऊ आदमीए मौत सर्दी झखामा जेही छोटी-मोटी बमारी करै बी मौत । शरीरा दी नी रोगा रोकणे शक्ति रंहदी और आदमीए हआ आखरकार मौत । एड्से बमारीए कारण हआ शरीरे धीमी और दर्दनाक मौतो शकर ।
बचाव
यूज की दी सूई और छिंगूऐदै खूना का लागा सावधानी बरतणी खासकर जेभै शरीरा दी कोई खुलअ जख्म हआ । होरी लाई दी सूई नी कधी बी केही बी हालता दी लाणी ।
आपणै जीवन साथी यानी एकी का छाडी नी होरी कोही संघै यौन संबंध बणाणे आथी।
सोभी का बडी गअल आसा कि एडसे बारै लागा गराँअऐ-गराँअऐ जागरूकता फलाऊणी
पाणीओ बचाव
पाणीओ वचाव करनअ आसा आझ माणूए सोभी का बडी जरुरत । जै हामा धरती दी माणुए आझकी और कालकी दूई पीळीए साफ पाणीए गरज पूरी करणी, तै लागा हामा पाणीओ बचाव करणअ। आझ आसा ईहअ जरुरी की हाम्है लोळी पाणीओ इस्तेमाल बढिया करै किअ,अह आसा लिखअ द बी की पाणी ही आसा जिंदगी।
पाणीए समस्या सोभी का बडी समस्या
आझ भाळा हाम्है की कई जैगा मरा लोग बिणा पाणी। और कई जैगा लागा गंदअ पाणी झुटणअ, अह समस्या लागी दा बढदी हर जैगा पुरै भारता दी। बढी करै बोलै ता अह आसा पूरै ससारे समस्या। म्हारै देशा दी मरा कई लोग पाणीए समस्या करै, पर तै बी नी सरकार ऐता दी धैन दैंदी। जै अह समस्या ऐतरी बडी आसा तै आसा आझ सोभी ऐते बाहरै सोचणे जरुरत।
पाणीए समस्यऐ कारण और परिणाम
पाणीए समस्यओ सोभी का बडअ कारण आसा साफ पाणीओ दुरूपयोग और पाणीए बरैबादी। म्हारै देशा दी पाणीए बरैबादीओ एक होर कारण आसा कि म्हारै देशा दी नी लोग पाणीए बचावे बारै धैन दैंदै आथी ना ता ऐते बारै पाक्की शिक्षा भेटदी। ऐतरअ इ नी म्हारै देशा दी नी पाणी बचाअणे जरुरी तकनीक और साज-समान बी आथी। जै इहअइ चलदअ रहा तै मुकणै म्हारै पाणीए संसाधन सुलै सुलै एकी धैळै पोरी और अह आसा म्हारै आपणै और सोभी पशु-पक्षीए बजूदा लै बी एक खातरअ।
मदद करणे तरीकै
एभै तैणी की दी गला-बाता का हआ अह साफ कि पाणीए समस्या आसा सोभी का बडी समस्या और हाम्हा सोभी आसा ऐता वाखा धैन दैंणे जरुरत । जै लोग ऐते बारहै जागरुक हआ ता तै पळणअ सरकारा लै बी दबाव और तेखअ लागणअ सरकाराआपी बी ऐते बारहै सोचणअ और काम करणअ।
हाम्है सका पाणी कई तरीकै संघै बचाऊई और साफ डाही, तिंआ तरीकै आसा: हागणखानै दी लागा कम पाणी तरैलणअ, पाणीए नळकै नी बिणा कामै खुलै छाडणै, झीकळै-टाल्है धोणा लै और न्हैऊणा लै नी साबा का बाधू पाणी छेबणअ बगैरा। जै हाम्है सोभ इना कामा सही संघै करै ता तै सका हामहै पाणीए समस्या बडी भारी कम करी
भ्रष्टाचार
आझ भाळा हाम्है आपणै समाजा दी हर तरफा दी कई बुरै-बुरै काम लागै दै हंदै और भ्रष्टाचार आसा तीना मांझै एक। पूरी दुनिया दी आसा भ्रष्टाचार कोई नी कोई मात्रा दी मजूद। करणी म्हारै देशै गला, भ्रष्टाचार आसा फैलअदअ म्हारै देशै एतरअ ज्यादअ कि ऐहअ नि कुण एक विभाग होऐ कि जेथ भ्रष्टाचार नि आथी होए। सान शब्दा दी बोलणअ लागे, भ्रष्टाचारो मतलब हआ रेशपत लणअ या कोई कामा लै जेतरअ जायज आसा तेता का ज्यादअ पैसअ लणअ। आझकाला लमागभग हर आदमी सीधी आपणी पळी दी। आदमी लागैदा धैळी -दर- धैळी बडै भारी लोभी लाळची हंदै। आपणै लाळचा पूरै करना लै लआ लोग भ्रष्टाचारो सारअ। भ्रष्टाचार आसा म्हारै समाजे बुराईओ सोभी का बडअ कारण, अह सका म्हारै पूरै देशा बरैबाद करी।
भ्रष्टाचार एक समस्या
ज्यादातर हआ ईहअ कि जेभै लोग भ्रष्टाचारे गअल करा, तै तिने मनै एछा ढबै-धेलेओ बचार, पर बुरी खबर आसा एही कि एते जळ आसा एता का बी डुघी और ऐते पहु़ंछ आसा एता का बी दूर। भ्रष्टाचार आसा नैतिक शळण जुण सका एकी आदमी बडी-बडी मसीबता दी पाई। श्ळैघा घळणी, लाळच, और चोरी करणी आसा भ्रष्टाचारे कुछ लग-लग रूप।
भ्रष्टाचारे फअळ
जेभै एक आदमी भ्रष्ट हआ तेभै बणा सह श्लैघी, चोरी करणै आळअ, और धोखै दैणै आळअ। मनै भरीया लाळच और जुंग-जळै साबै चीजा कठा करने बाद बी नी भ्रष्ट आदमी संतुषटी हंदी। समाजा दी और एहै आदमीए आपणै परिवारा दी बी पळा ऐते बडै भारी बुरअ असर। तिना नैळ रहणै आळै लोग करा ठघणेओ अनुभव। भ्रष्ट आदमी दी नी लोगा कधी भरोसअ हंदअ। जै कुण समाज भ्रष्ट होए, सह करा पूर देशे अर्थव्यवस्था खराभ किल्हैकि ईहअ करै हआ बागे लोगा संघै वपार करणअ मुश्कळ। दुखै गअल आसा अह कि दुनिया दी आसा लगभघ सोभै सरकारा भ्रष्ट किल्हैकि राजनेते हआ आपणै फायदे पळी दी, लोगे हिता करा तिंयां भाळअ ना भाळअ।
भ्रष्टाचार दूर करणे तरीकै
भ्रष्टाचारा दुर करणा लागा हामा आपणअ मन परखणअ कि म्हारै मना दी लाळच किनी आसा। जै कहरै मना दी लाळच आसा और सिधअ आपणै हिता लै कामा करणेओ सोचा तेऊ लागा आपणअ अह भाव बदळणअ। छाळ-बपार करणअ पूरी मानदारी संघै। होरी संघै ठगी और धोखअ करणअ। सोभी लोळी अह गअल ढाकी कि ना भ्रष्टाचार करणअ ना करणै दैणअ
रक्ततदान
खूनो दान एक महान काम
म्हारै समाजै एछा कई बारी एही स्थिति जेभै कहा आदमीओ बडै परेशणा दी और दुर्घटणा दी बगा बडै भारी खून, बडै भारी खून बगणै कारण या कई बारी डेंगू जेही बमारीए बजह पळा खूने जरूरत । जै एही स्थिति दी जरूरते साबै खून नाँईँ भेटा तै सका तै हआ आदमीए मौत बी । बमारीए और दुर्घटणे बजह हणै आळी खूने क।मीए कारण हआ हर धैळै बडै भारी लोगा खूने गरज । हटै-कटै और तंदरूतस्त आदमीए गरजी आदमी लै खूने दाना करणै बजह सखा कई लोगे जान बची । लाज-पूआई करणै आलै दला लागा अह पाकअ करणअ कि खूने दाना करणै आळै आदमीओ और खूना लणै आळै आदमीओ खून लोळी एकी समूंहो हुअ । तेऊ लागा अह बी पाक्कअ करणअ कि खूने दाना करणै आळै आदमी दी नी कोहे बमारी होए ताकि खूना चढाँऊँदा बारी खूना चढाँऊँणै आळअ आदमी कहा बमारीओ शकार नी होए । तिना लागा खूने जाँच बी करणी, ईह पाक्कअ करणा लै कि दान किअ द खून पूरी तरह सूरक्शित आसा बी की नांईं ।
खूनो दान किधी और किहअ करै
खूनो दान सका हाम्है कोई जानै मानै दै होसपीटळै करी और खूनो दाना लै आयोजित शिविरा दी बी सका खूनो दान करी । शहरै हआ खूने बैंक जिधि खूना और एते होरि तत्वा डाहा लामै टैमा तैणी सभाळी और गरजी आदमी सका एता यूज करी । अह गअल आसा सोभी का जरूरी कि खूने दाना करणै टैमै जूण खून काढा सह आदमी लोळी जाणकार और भरोसेओ हुअ और खून ळोळी साफ-सुथरी जगह दी साफ-सुथरै साज समाना संघै काढअ । जै कहा लागा कि जगह नि साफ-सुथरी आथी तै नी तिधी खूनों दान करणअ किल्हैकि एते सका खातरनाक परिणाम हई ।
खूने गरजो नवारण
जहा आदमी खूने गरज हआ तेऊ लै लागा हामा खूने दाना करदै तैर रहणअ । एहअ करी करै सका हाम्हैं एकी आदमीए जान बचाऊई । कई लोगा लागा ईहअ कि खूने दाना करै एछा कमजोरी और तिँआ सका बेहोश बी हई, पर अह गअल आसा झूठी । कजोऐ हटअ-कटअ और तंदरूतस्त आदमी सका खूनो दान करी ।
खूनो दान आसा सोभि का बडअ दान
किल्हैकि एता करै बचा कईए जान ॥
